पाल्पा । नेकपा एमालेका तर्फबाट पाल्पा क्षेत्र नं. २ का प्रतिनिधिसभा सदस्य उम्मेदवार ठाकुर प्रसाद गैरेले स्थानीय विकासका लागि एमालेले सुरु गरेका योजनाहरूलाई तार्किक निष्कर्षमा पु¥याउन आफ्नो उम्मेदवारी रहेको बताउनुभएको छ ।
चुनावी घरदैलो अभियानका क्रममा तिनाउ गाउँपालिकाको वडा नं. २ दोभान र वडा नं. ३ को ज्यामिरेलगायतका क्षेत्रमा पुग्नुभएका नेता गैरेले स्थानीयवासीसँगको छलफलमा सो कुरा बताउनुभएको हो । मतदाताका गुनासा र सुझाव सुन्दै उहाँले भन्नुभयो, “पाल्पाको विकास र समृद्धिका लागि नेकपा एमालेले स्पष्ट खाकासहित काम गरिरहेको छ । विगतमा सुरु भएका सडक, खानेपानी र पूर्वाधारका अधुरा कामहरू पूरा गर्न हामी प्रतिवद्ध छौँ ।”
नेता गैरेले तिनाउ क्षेत्रको मुख्य समस्याको रूपमा रहेको सिद्धार्थ राजमार्गको स्तरोन्नति, दोभान–ज्यामिरे क्षेत्रका भित्री सडकहरूको ग्राभेल तथा कालोपत्रे र स्थानीय कृषि उत्पादनको बजारीकरणलाई आफूले विशेष प्राथमिकतामा राखेको उल्लेख गर्नुभयो । “जनताका समस्या सुन्ने र त्यसलाई सदनसम्म पु¥याउने काममा म सधैं दत्तचित्त रहनेछु,” उहाँले थप्नुभयो।
घरदैलोका क्रममा स्थानीयले शिक्षा, स्वास्थ्य र सिँचाइको असुविधा र दोभानमा बढ्दो सहरीकरणसँगै शहरी व्यवस्थापनको माग राखेका थिए । जवाफमा उम्मेदवार गैरेले एमालेको समृद्ध नेपाल, सुखी नेपालीको लक्ष्य स्थानीय स्तरबाटै कार्यान्वयन हुने विश्वास दिलाउनुभयो ।
पछिल्लो समय पाल्पामा चुनावी सरगर्मी तीव्र बनेको छ । गैरेले यसअघि पनि यस क्षेत्रको जनप्रतिनिधिको रूपमा काम गरिसकेकाले मतदाताहरू उहाँको सक्रियताप्रति आशावादी देखिएका छन् । अभियानमा एमालेका जिल्ला तथा स्थानीय नेताहरूको पनि उपस्थिति रहेको थियो ।
