पाल्पा। नेपाल आदिवासी जनजाति पत्रकार महासंघ (फोनिज) पाल्पा शाखाको अध्यक्षमा इमान सिं राना चयन हुनुभएको छ ।
फोनिजको पाँचौ जिल्ला अधिवेशनबाट रानाको अध्यक्षतामा १३ सदस्यीय नयाँ कार्यसमिति सर्वसम्मत रुपमा चयन गरेको छ । जसको उपाध्यक्षमा एवत सारु, सचिवमा धन बहादुर ठाडा, सहसचिवमा मीना कुमाल, कोषाध्यक्षमा अनिल लिगल रहनुभएको छ । बाँकी दुई सदस्य पछि मनोनयन गर्ने गरी बनेको समितिको सदस्यहरुमा होम राई मगर, पुनाराम सुनारी, विमल कुमाल, रुपा थापा र प्रेम कान्छा राई सदस्य रहनुभएको छ ।
अधिवेशनले केन्दीय प्रतिनिधिमा देव बहादुर पचभैया, निवर्तमान अध्यक्ष रन बहादुर कुमाल, राजेन्द्र लिगल, मिना कुमारी कुमाल र रुपा थापालाई चयन गरेको छ । त्यस्तै प्रदेश प्रतिनिधिमा दान बहादुर हिस्की, दिल बहादुर गाहा, होम राई, प्रेम कान्छा राई र यम बहादुर थापालाई चयन गरेको निर्वाचन समितिका संयोजक रेखीराम रानाले जानकारी दिनुभयो ।
पदभार ग्रहण गर्दै नवनिर्वाचित अध्यक्ष रानाले अग्रजहरुको मार्गदर्शन सहित सबैलाई समेटेर अघि बढ्ने बताउनुभयो । उहाँले आदिवासी जनजातिका सवालको उजार गर्नुका साथै समग्र नेपाली पत्रकारिताको हितमा क्रियाशील रहने बताउनुभयो ।
निवर्तमान अध्यक्ष रन बहादुर कुमालले अधिवेशन सम्पन्न गर्नका लागि सहयोग गर्नुहुने महानुभावहरुमा धन्यवाद ज्ञापन गर्दै फोनिजलाई थप सक्रिय बनाएर अघि बढ्न नयाँ कार्यसमितिलाई शुभकामना व्यक्त गर्नुभयो ।
