पाल्पा । त्रिभुवन विश्वविद्यालय, अनुदान आयोग सानोठिमीको सहयोग र अनुसन्धान व्यवस्थापन समिति, त्रिभुवन बहुमुखी क्याम्पस पाल्पाको आयोजनामा तीन दिने अनुसन्धनात्मक लेखन तालिम सम्पन्न भएको छ ।
त्रिभुवन बहुमुखी क्याम्पससहित पाल्पाका विभिन्न पाँच क्याम्पसका ५९ जना प्राध्यापकहरू सहभागी तालिममा डा.टंक पन्थ, डा.रामनाथ न्यौपाने, डा.निलम नेपाल, डा.पितबहादुर नेपाली, डा.लक्ष्मी सापकोटा, शारदा प्रसाद भट्टराई, शारदा खनाल, सन्तोष खनाल, गोपालप्रसाद वश्याल र राजु पराजुलीले अनुसन्धनात्मक लेखनका विभिन्न पक्षका बारेमा कार्यपत्र प्रस्तुत गर्नुभएको थियो । कार्यक्रममा अनुसन्धान कार्य र अनुसन्धनात्मक लेखनका विधि, प्रक्रिया, शैली, ढाँचालगायत अनुसन्धानका मूल्य, मान्यता र आचरणकासम्बन्धमा कार्यपत्र पेश गरिएको थियो ।
तालिम समापनका अवसरमा त्रिभुवन बहुमुखी क्याम्पसका प्रमुख टंकप्रसाद भट्टराईले कक्षा शिक्षणमा नवीनतम विधि प्रविधिको प्रयोग गर्न आवश्यक रहेको बताउनुभयो । उहाँले त्यसका लागि प्राध्यापकहरूको क्षमता विकास तालिमले सहयोग पुग्ने विश्वास व्यक्त गर्नुभयो ।
कार्यक्रममा भैरव बहुमुुखी क्याम्पस छहराका प्रमुख खिमराज घिमिरेले प्राध्यापकहरू राष्ट्रकै गहना भएको बताउनुभयो । त्रिभुवन बहुमुखी क्याम्पसका विद्यार्थी कल्याण समितिका संयोजक पुष्कर आचार्यले प्राध्यापकहरूले पारस्परिक आदानप्रदानबाट सिक्नुपर्ने बताउनुभयो । प्राध्यापक संघ इकाइ समितिका सभापति खिम बहादुर रानाले त्रिभुवन बहुमुखी क्याम्पसमा प्राज्ञिक वातावरण सिर्जना भएको बताउनुभयो ।
कार्यक्रममा कर्मचारी संघ इकाइ सभापति डुकुलराज ढकाल, स्ववियु सभापति कृष्ण अर्यालले कार्यक्रम अनुसन्धनात्मक कार्यका लागि उत्प्ररणामूलक रहेको बताउनुभयो । त्यस्तै सहभागीका तर्फबाट लक्षिमा ज्ञवाली र तुलसीराम पोख्रेलले कार्यक्रमबाट प्राज्ञिक उन्नयन, व्यक्तित्व विकास र ज्ञान सीप अद्यावधिक भएको बताउनुभएको अनुसन्धान व्यवस्थापन समितिका संयोजक डा.शंकर गैरेले जानकारी दिनुभयो ।
