पाल्पा । बगनासकाली गाउँपालिकाको आयोजनामा लैङ्गिक हिंसा विरुद्धको १६ दिने अभियान अन्तर्गत हिंसा विरुद्धको सचेतना कार्यक्रम सम्पन्न भएको छ ।
कार्यक्रमका गाउँपालिका अध्यक्ष सरस्वती चिदीले बालमैत्री घोषणा भएको नमूना गाउँपालिका रहे पनि पूर्ण रूपमा अझैसम्म बाल विवाह निर्मुल पार्न नसकिएको बताउदै न्यूनीकरणमा लागि प्रयास गरिएको बताउनुभयो । उहाँले बजेट र नीति निर्माणमा महिलाको अर्थपूर्ण सहभागी बनाउदै आएको जानकारी समेत गराउन्भयो । वडा तहबाट नै लैङ्गिक हिंसा न्यूनीकरणका कार्यक्रमलाई निरन्तर गर्नुपर्नेमा अध्यक्ष चिदीको जोड थियो ।
कार्यक्रममा गाउँपालिका उपाध्यक्ष हरिप्रसाद पाठकले लैङ्गिक हिंसा अन्त्यका लागि गाउँपालिकाले हरेक वर्ष विभिन्न कार्यक्रम गर्नुका साथै आवश्यक बजेटको व्यवस्था गर्दै आएको बताउनुभयो । सचेतनाका कार्यक्रमलाई अझै प्रभावकारी बनाउँदै लैजानुपर्नेमा उपाध्यक्ष पाठकको जोड थियो ।
कार्यक्रममा जिल्ला प्रहरी कार्यालय पाल्पाका प्रहरी उपरीक्षक हेरम्ब शर्माले सहजीकरण गर्दै जस्तो सुकै काम गरे पनि आलोचना हुने बताउदै समानता भन्दा पनि समतामा ध्यान दिनुपर्ने बताउनुभयो । पछिल्लो समय मानसिक हिंसा बढेको बताउदै पुरुषमाथी हुने हिंसा पनि बढिरहेको उहाँको भनाइ थियो ।
कार्यक्रममा हिंसाका प्रकार, हिंसा हुने कारण, प्रहरीसम्म पुग्ने प्रक्रिया, कानुनी प्रावधान तथा व्यवस्था लगायतका विषयमा प्रहरी प्रमुख शर्माले जानकारी दिनुभयो । पाल्पामा सबैभन्दा बढी घरेलु हिंसा र जवर जस्ती करणीका घटना दर्ता भएको जानकारी गराउदै चालु आर्थिक वर्षमा मात्रै घरेलु हिंसाका ३३ वटा निवेदन जिल्ला प्रहरी कार्यालय पाल्पामा दर्ता भएको जानकारी दिनुभयो ।
कार्यक्रममा सहजीकरण सामाजिक श्रोत विकास केन्द्र पाल्पाका प्रमुख चोपलाल गिरी, लेखा अधिकृत कोशलराज पौडेल, कार्यपालिका सदस्य गिता रेग्मीलगायतले प्रायः जसो घरभित्र हुने हिंसा महिलाबाट महिलामाथी हुँदै आएको बताउनुभयो । उहाँहरुले गाउँपालिकाले महिला हिंसा न्यूनीकरणका लागि महिलालाइ आर्थिक रुपमा बलियो बनाउने कार्यक्रम सञ्चालन गर्नुपर्नेमा जोड दिनुभयो ।
कार्यक्रममा बगनासकाली गाउँ पालिकाका जनप्रतिनिधि, महिला संजालका सदस्य, सङ्घ संस्थाका प्रतिनिधिको सहभागिता रहेको थियो ।
यस वर्षको लैङ्गिक हिंसा विरुद्धको १६ दिने अभियान लैङ्गिक हिंसा अन्त्यको सुनिश्चितता महिला र बालबालिकामा लगानीको ऐक्यबद्वता “ भन्ने नाराका साथ नोभेम्बर २५ देखि सुरु भएको छ । डिसेम्बर १० गतेसम्म सञ्चालन हुने अभियानमा जिल्लाका स्थानीय तहहरुले विभिन्न कार्यक्रमहरु आयोजना गरेर मनाइरहेका छन ।
