पाल्पा । चरचरे भलिबल कप २०८० को उपाधि सिद्धार्थ नगर ग्रीन सिटि युवा क्लब भैरहवाले जितेको छ ।
चरचरे भलिबल क्लब तिनाउ ५ चरचरेले आयोजनामा भएको भलिबल प्रतियोगिता एक साता अगाडि देखि चरचरे खेल मैदानमा सञ्चालन भैरहेको थियो । बिहीबार भएको प्रतियोगिताको फाइनल खेलमा गुल्मी भलिबल क्लब गुल्मीलाई ३/१ को सेटमा हराउदै ग्रीनसिटिले उपाधि हात पारेको हो ।
प्रतियोगितामा ४६ समूहको सहभागीता रहेको प्रतियोगितामा गुल्मी गुल्मेली लाङ्घाली युवा क्लब बुटवल र सिद्धार्थ ग्रीनसिटी भैरहवाले आयोजक चरचरे भलिबल क्लबलाई हराउदै प्रतियोगिताको फाइनलमा प्रवेश गरेका हुन । सेमिफाइनलमा पराजित आयोजक चरचरे भलिबल क्लब तथा गुल्मेली लाङ्घाली युवा क्लब बुटवल तेस्रो भए ।
खेल अबधिभर उत्कृष्ट खेल प्रदर्शन गर्ने सिद्धार्थ नगर ग्रीनसिटिका दिपेन्द्र कार्की उत्कृष्ट खेलाडी घोषित भए । प्रतियोगितामा पहिलो हुनेलाइ नगद चालिस हजार, दोस्रो हुनेलाई नगद विस हजार र तेस्रो हुनेलाई नगद दस÷ दस हजार रुपैयाका साथमा ट्रफी मेडल तथा प्रमाणपत्र प्राप्त गरेका छन् ।
तिनाउ गाउँपालिका अध्यक्ष प्रेम श्रेष्ठले विजयी प्रतियोगीहरुलाई पुरस्कार वितरण गर्दै बधाई तथा शुभकामना व्यक्त गर्नुभयो । उहाँले गाउँपालिका खेलकुदको विकासका निम्ती आवश्यक सहयोग उपलब्ध गराउन सधै तयार रहेको बताउनुभयो । गाउँपालिका अध्यक्ष श्रेष्ठले खेलकुदले युवालाई स्वस्थ र सकारात्मक बनाउने बताउदै गाउँपालिकाको विकासमा समेत सहयोग पुग्ने विश्वास व्यक्त गर्नुभएको आयोजक क्लबका अध्यक्ष दिपक रास्कोटीले जानकारी दिनुभयो ।
