पाल्पा । जबर्जस्ती करणी गरी अश्लिल भिडियो बनाएर धम्क्याएको आरोपमा पाल्पा प्रहरीले एक युवकलाई पक्राउ गरेको छ । गत वैशाख ५ गते तानसेनको एक होटलमा महिलालाई जबर्जस्ती करणी गरेपछि भिडियो बनाएर धम्की दिएको आरोपमा प्रहरीले २४ वर्षीय आशीष सुनारलाई पक्राउ गरेको हो ।
रुपन्देहीको बुटवल उपमहानगरपालिका–९ बस्ने सुनारले रुपन्देहीकै २५ वर्षीया महिलालाई भिडियो सार्वजनिक गर्ने धम्की दिएर पटक पटक करणी गरेको प्रहरीको अनुसन्धानमा खुलेको छ । इलाका प्रहरी कार्यालय बुटवलको समन्वयमा सुनारलाई शुक्रबार पक्राउ गरिएको हो ।
सुनारले अश्लिल भिडियो सार्वजनिक गर्ने र सामाजिक सञ्जालमा भाइरल बनाउने धम्की दिएपछि पीडित युवतीले प्रहरीमा जाहेरी दिएको आधारमा सुनारदाई पक्राउ गरिएको जिल्ला प्रहरी कार्यालय पाल्पाका सूचना अधिकारी वीरेन्द्र थापाले बताउनुभयो । घटनाका सम्बन्धमा थप अनुसन्धान भइरहेको प्रहरीले जनाएको छ ।
