सुशीला रेग्मी
पाल्पा । रामपुरमा असल कर्म गर्ने बुहारी, दम्पत्तिसहित उपभोक्तालाई सम्मान गरिएको छ । रामपुर नगरपालिका वडा नं २ को आर्थिक वर्ष २०८०/०८१ का लागि नीति कार्यक्रम तथा वजेट तर्जुमा सम्बन्धी वडा सभा तथा सम्मान कार्यक्रमको अवसरमा सम्मान गरिएको हो । कार्यालयले वडाभित्र रहेका असल बुहारी, असल दम्पत्ति सहित ज्येष्ठ नागरिक, उत्कृष्ट उपभोक्ता समिति, स्थानीय पञ्जिकाधिकारी, निवर्तमान वडाका जनप्रतिनिधिलाई सम्मान गरेको छ ।
शुक्रवार असल बुहारी मथुरा घिमिरे, असल दम्पत्ति टुकबहादुर थापा र लेखमाया थापा, ज्येष्ठ नागरिक भुमबहादुर थापा, बोटेनिमारा देखि कृष्णादेवी सम्मको मोटरबाटो स्तरोन्नति उपभोक्ता समितिका अध्यक्ष तिलकबहादुर कुमाल, सचिव शिशिर कुमाल, स्थानीय पञ्जिकाधिकारी तारानाथ पोखरेल, निवर्तमान वडाध्यक्ष ताराबहादुर थापा, निवर्तमान वडा सदस्यहरु भिमबहादुर खड्का, नुरबहादुर थापा, कार्यपालिका सदस्य तथा वडा सदस्य तेजकुमारी गैरे, नगर उपप्रमुख बालकुमारी थापालाई सम्मान पत्र, छाता र दोसल्ला ओढाएर सम्मान गरिएको हो ।
रामपुर २ का वडाध्यक्ष कृष्णबहादुर दर्जीको अध्यक्षतामा कार्यक्रम भएको हो । वडाध्यक्ष दर्जीले आगामी आर्थिक वर्षको नीति तथा कार्यक्रम सार्वजनिक गर्दै टोल विकास समितिबाट छनोट भई आएका विभिन्न योजनाहरु सहभागीहरुलाई जानकारी गराए । वडाको प्राथमिकताको आधारमा टोल विकास समितिमार्फत योजना सङ्कलन गरी ल्याइएको र सो योजनालाई क्रमिक रुपमा वडाको आवश्यक अनुसार काम गर्दै जाने वडाध्यक्ष दर्जीको भनाइ छ । मोटरबाटो स्तरोन्नति, खानेपानी मर्मत, कुलो मर्मत, आमा समूहको भवन निर्माण, विपन्न परिवार स्वास्थ्य बीमा, खेलमैदान निर्माण, घरेलु उद्योग आरन व्यवस्थापन, वडा नं २ र ३ जोड्ने निस्दीखोलामा पक्की पुल निर्माण, कालीगण्डकी करिडोरको पक्की पुलमा ड्याम बाँधी निस्दीखोलाको तलाउ निर्माण, घन्सारबारीदेखि घिमिरेटार फाँटसम्म पकेट क्षेत्र, प्रतिक्षालय निर्माण, ठूलोपाखा सामुदायिक वनमा जडीबुटी बिस्तार, वडा नं २ को वडा कार्यालय भवन निर्माण, दलित भवन निर्माण, पशुपालन, मौरीपालन कार्यक्रम, बाँदरकुना पर्यटन प्रवद्र्धन, सेराटोल चौतारी निर्माण, बाल उद्यान निर्माण, विद्यालयको कक्षाकोठा मर्मत, कुमाल सँस्कृती सोरठीनाच सामान खरिद तथा संग्राहालय निर्माण, बेरोजगार युवा सीपमुलक कार्यक्रम लगायतका योजना टोल विकास समितिबाट वडामा आएको वडाध्यक्ष दर्जीले बताए ।
कार्यक्रममा निवर्तमान वडाध्यक्ष ताराबहादुर थापा, नेपाली कांग्रेस वडा सभापति देवबहादुर राना, नेकपा एमाले प्रतिनिधि पदमबहादुर कुमाल, स्थानीय पञ्जिकाधिकारी तारानाथ पोखरेल, सरस्वती माविका प्रधानाध्यापक रामचन्द्र पोखरेल, दुर्गादेवी सामाजिक उद्यमी महिला समूह अध्यक्ष विजु घिमिरे, नेपाल पत्रकार महासंघ पाल्पाका जिल्ला सदस्य दुर्गेश मल्ल लगायतले वडाका विकास निर्माणका सन्दर्भमा आफ्ना भनाइ राखेका थिए ।
