पाल्पा । हेफर ईन्टरनेशनल नेपालले रामपुर नगरपालिका, पूर्वखोला र निस्दी गाउँपालिकालाई कोभिड महामारीबाट बच्न सहयोग रकम हस्तान्तरण गरेको छ । सामाजिक उत्तरदायित्व अन्तर्गत कोरोना महामारी बिरुद्ध लड्न हेफरले रकम प्रदान गरेको हो ।
हेफर इन्टरनेशल नेपालले स्थानीय साझेदार संस्थाहरुको सहकार्यमा जिल्लाको रामपुरमा कार्यक्रम गरी रामपुर नगरपालिका सहित अन्य २ गाउँपालिकालाई राहत रकम स्वरुप चेक हस्तान्तरण गरेको हो । जिल्लाको १० वटै पालिकामा सहयोग रकम हस्तान्तरण अभियान चलाएको छ ।
हेफरले रामपुरमा भएको कार्यक्रममा तीन वटै स्थानीय तहलाई १५÷१५ लाख रुपँयाको चेक हस्तान्तरण गरेको हो । स्थानीय साझेदार संस्थाहरुको समन्वयमा जिल्लाका १० स्थानीय तहमा १ करोड ४९ लाख रुपैयाँ सहयोग गरेको हेफर इन्टरनेशनल नेपाल पाल्पाका कार्यक्रम प्रबन्धक अनन्त सिलवालले जानकारी दिए ।
