समुदायमा कोरोना संक्रमण बढेपछि स्थानीय तहले नमुना संकलनको दायरा बढाएका छन् । स्थानीय तहले स्वाब संकलनलाई तीब्रता दिइँरहँदा पाल्पा अस्पताल पिसिआर प्रयोगशालामा भने परीक्षण किट पर्याप्त व्यवस्थापन अझै हुन सकेको छैन । गाउँगाउँबाट स्वाब संकलन भएर प्रयोगशालामा पठाएपनि जाँच गनेर् किटको भने पर्याप्तता नहुँदा समस्या नै छ । भएका किट सकिएको र थप किट व्यवस्थापन हुन नसक्दा भने परीक्षण दायरा बढाएर पनि जाँच हुन सकेको छैन । दैनिक तीन लटसम्म झण्डै ३ सय जाँच गर्न सकिन्छ । तर अहिले कतिपय दिनमा ५० पनि जाँचेको छैन । लुम्बिनी मेडिकल कलेजले झण्डै १ सय ३५ जाँच गर्न सक्छ । मेडिकल कलेजको भने आफ्ना लागि मात्र प्रयोगमा छ । सहर र गाउँगाउँमा ज्वरो र रुघाखोकीका बिरामी बढेपछि स्थानीय तहले वडास्तरमा पुुगेर कोरोना परीक्षण थालेको हुन् । तानसेन नगरपालिका, रम्भा, रैनादेवी छहरा, तिनाउ गाउँपालिकाले समुदायस्तरमा पुगेर स्वाब संकलन गरेका छन् । तर प्रयोगशालामा परीक्षण भने समयमा हुन सकेको छैन ।
कोरोना संक्रमितको संख्या गाउँगाउँमा बढे वा घटेको थाहा पाउन स्थानीय तहले शिविर सञ्चालन गरेको हो । तानसेन, रम्भा र रैनादेवी छहराले शिविर नै राखेर स्वाब लिएका छन् । अब अन्य लक्षण देखिएका वडामा पनि लिइरहेका छन् । कतिपय स्थानीय तहले नमुना परीक्षण गरेर पठाएका छन् । समुदायस्तरमा संक्रमण बढेपछि तानसेन नगरपालिकाका सबै वडामा पिसिआर शिविर राखेको हो । तानसेन नगरपालिकाले पाल्पा अस्पतालको समन्वयमा तानसेनका सबै वडामा कोरोना कोरोना परीक्षणका लागि पिसिआर शिविर राखिएको हो । यसबाट समुदायमा अवस्था कस्तो छ भन्ने थाहा पाउन सकिन्छ । कोरोना नियन्त्रण, रोकथामका लागि यसले सहयोग पुग्नेछ ।
पछिल्ला केही दिनमा परीक्षण बढेपनि जाँच कम हुँदै जानु राम्रो होइन । ज्वरो आउने, रुघाखोकी लाग्ने बिरामी जतासुकै छन् । समुदायसम्म धेरै फैलन नपाओस् भनेर वडामा अवस्था बुझ्नु राम्रो पक्ष हो । शिविरमा कोरोनासँग मिल्दोजुल्दो लक्षण देखिएका, खाद्यान्न, तरकारी तथा दुध व्यापारी, बाहिरबाट गाउँमा भित्रिएकाको स्वाब संकलन गर्दा अवस्था थाहा पाउन धेरै सहज हुन्छ । अन्य स्थानीय तहले पनि एन्टिजेन खरिद गरेरै भएपनि परीक्षण भने बढाउन जरुरी छ । यसका लागि राजनीतिक दल, जनप्रतिनिधिले किट व्यवस्थापनमा सहयोग गर्नुपर्छ । प्रयोगशालामा स्वाब पठाएर जाँच गर्न धेरै दिन लाग्ने भएकाले एन्टिजेन भएपनि प्रयोग गरेर परीक्षण गर्न सके अवस्था थाहा पाउन सहज हुने थियो ।
