सरस्वती दंगाल
पाल्पा (करुवा)। समुदायमा कोरोना संक्रमण बढेपछि स्थानीय तहले नमुना संकलनको दायरा बढाएका छन् । पिसिआर ल्यावमा परीक्षण किट व्यवस्थापन भएपछि परीक्षण दायरा पनि बढाइएको हो । सहर र गाउँगाउँमा ज्वरो र रुघाखोकीका बिरामी बढेपछि स्थानीय तहले वडास्तरमा पुुगेर कोरोना परीक्षण थालेको हुन् । तानसेन नगरपालिका, रम्भा, रैनादेवी छहरा, तिनाउ गाउँपालिकाले समुदायस्तरमा पुगेर स्वाब संकलन गरेका छन् ।
कोरोना संक्रमितको संख्या गाउँगाउँमा बढेपछि शिविर सञ्चालन गरी कोरोना परीक्षण गर्न थालेको रम्भा गाउँपालिका अध्यक्ष विष्णुप्रसाद भण्डारीले बताए । उनका अनुसार रम्भाको हुँगीमा मात्रै ७८ जनाको स्वाब संकलन गरिएको छ । ‘शिविर नै राखेर स्वाब लिइएको छ,’ उनले भने, ‘अब अन्य लक्षण देखिएका वडामा पनि लिइने छ ।’ रम्भाको फोक्सिङकोट, पिपलडाँडा, ताँहुमा पनि कोरोना लक्षण भएका बिरामी धेरै छन् । रम्भामा १ सय ५ जना संक्रिय संक्रमित छन् । समुदायस्तरमा संक्रमण बढेपछि तानसेन नगरपालिकाका सबै वडामा पिसिआर शिविर सुरु भएको छ । सोमबार तानसेन बजार क्षेत्रमा संकलन गरेर अभियान सुरु भएको नगरप्रमुख अशोककुमार शाहीले बताए । तानसेन नगरपालिकाले पाल्पा अस्पतालको समन्वयमा तानसेनका सबै वडामा कोरोना कोरोना परीक्षणका लागि पिसिआर शिविर राखिने उनले बताए ।
कोरोना नियन्त्रण, रोकथामका लागि वडावडामा स्वाव संकलन गरेको पाल्पा अस्पतालका अध्यक्ष नेत्रप्रसाद पाण्डेयले बताए । ‘अस्पताल अन्तर्गतको ल्यावको प्राविधिक सहयोगमा सबै वडामा पुगेर स्वाब संकलन हुनेछ,’ उनले भने, ‘समुदायमै कोरोना संक्रमण बढेको छ । त्यसैले नमुना संकलन लाई तीब्रता दिइएको हो ।’ तानसेन नगरपालिकामा सक्रिय संक्रमित ४ सय ३३ जना रहेका छन् । ज्वरो आउने, रुघाखोकी लाग्ने बिरामी जतासुकै छन् । तर जाँच गर्न जान पहुँच नहुँदा घरै बसेर समुदायमा संक्रमण फैलिएको छ । ‘समुदायसम्म धेरै फैलन नपाओस् भनेर वडामै पुगेर पिसिआर शिविर राखेको हो,’ अध्यक्ष पाण्डेयले भने, ‘तानसेनबाट सुरु भएको अभियान अर्गली, बौघागुम्हा हुँदै सबै वडामा पुगिनेछ ।’
शिविरमा कोरोनासँग मिल्दोजुल्दो लक्षण देखिएका, खाद्यान्न, तरकारी तथा दुध व्यापारी, बाहिरबाट गाउ“मा भित्रिएकाको स्वाब संकलन गरिएकोे छ । रैनादेवी छहरा गाउँपालिकाले पनि गाउँपालिका रहेको वडामा शनिबार र बुधबार निःशुल्क स्वाव संकलन गरेको छ । समुदायमा फैलिएको कोरोना रोकथामका लागि वडावडामा पुगेर स्वाब संकलन गनेर् निर्णय गरेको गाउँपालिका अध्यक्ष रामबहादुर कार्कीले बताए ।
रैनादेवी छहराको भुवनपोखरीमा १ सय ७ जनाको नमुना स्वाव संकलन गर्दा ८२ जनामा कोरोना पुष्टि भएको थियो । स्वास्थ्य शाखा प्रमुख जीवन रानाका अनुसार विपद् व्यवस्थापन समितिको बैठकले पनि वडामा पुगेर स्वाब संकलन गर्ने निर्णय भए अनुसार काम अघि बढेको बताए । रैनादेवी छहरामा १ सय ३७ जना सक्रिय संक्रमित छन् । रम्भा गाउँपालिका वडा नं. २ को तुलडाँडा तथा गाबुडाँडाका घरघरै ज्वरो एवं खोकीका बिरामी देख्न थालेपछि स्वास्थ्य शाखा प्रमुख शिव अर्याल सहितको टोली गाउँगाउँमा डाक्टर सहितको टोली लिएर पुगेको छ । ‘जिल्लामा किट अभाव हुँदा झण्डै एक हप्ता कन्ट्याक्ट ट्रेसिङ गर्न समस्या भयो, अर्यालले भने, अहिले पूनः स्वाव संकलन कार्यलाई तिब्रता दिएका छौं ।’
पूर्वखोला गाउ“पालिकाभित्र अहिले १ सय ३७ कोरोनाका सक्रिय सङक्रमित छन् । स्वास्थ्य शाखा प्रमुख मोहन ढकालका अनुसार रिङ्नेरह, देविनगर, बीरकोट र सिलुवामा धेरै संक्रमितहरु रहेका छन् । ‘गाउँपालिकाले लक्षणसहितका कोरोना संक्रमितका लागि अक्सिजनसहित १० र थप १५ बेडको आइसोलेसन व्यवस्था गरेको छ,’ उनले भने, ‘टोलटोलमा लक्षण सहितका बिरामी छन् । अधिकांशले जाँच गनेर् र औषधी खान नमानन्ने समस्या छ ।’ तिनाउ गाउँपालिकाको पनि समुदायसम्म कोरोना संक्रमण फैलिएको छ । ‘संक्रमण थप फैलिन नदिन समुदायमा पुगेर परीक्षण थालेका हौं,’ तिनाउ गाउँपालिकाका स्वास्थ्य शाखा प्रमुख कृष्ण कार्कीले भने, ‘शंकास्पद बिरामीको स्वाब संकलन गरिएको छ ।’ तिनाउका सबै वडामा २ सय ४ जनाको स्वाब संकलन गरेकामा १ सय ८ जनामा कोरोना पोजेटिभ पुष्टि भएको उनले बताए । ‘सबै वडामा वडाध्यक्षलाई लक्षणसहितको बिरामी खोजी गर्न लगाएका थियौं,’ उनले भने, ‘त्यसपछि स्वाब संकलन गरेको हो ।’ उनका अनुसार सबै वडामा संक्रमण फैलिएको छ । उनले कोरोना पुष्टि भएर सामान्य अवस्थाका संक्रमितलाई होम आइसोलेसनमा बस्न सुझाव दिएको बताए । स्वास्थ्यमा बढी समस्या देखिएका संक्रमितलाई दोभानमा रहेको कोरोना अस्थायी अस्पतालमा उपचार गरिएको उनले बताए । तिनाउमा १ सय ७० सक्रिय संक्रमित छन् ।
